Vit sóknast eftir einum dugnaligum og ágrýtnum samskiftisfólki til Marknaðardeildina í BankNordik-samtakinum, ið hevur ábyrgd av samskifti, marknaðarføring, burðardygd og Investor Relations. Talan er um eitt tíðaravmarkað starv.

Starvið

Í starvinum sum samskiftisfólk fært tú saman við starvsfelagum á Marknaðardeildini ein virknan leiklut í arbeiðinum at leggja til rættis og evna til bæði innanhýsis og uttanhýsis samskiftið hjá BankNordik-samtakinum í Føroyum og Grønlandi.

Arbeiðið fevnir fyrst og fremst um at framleiða og rættlesa skrivligt tilfar til heimasíður, intranet, tíðindi, kundabrøv, framløgur, frágreiðingar, lýsingar og annað. Ein partur av arbeiðinum er eisini at dagføra og menna heimasíður og aðrar samskiftismiðlar hjá samtakinum. Harumframt fevnir starvið um aðrar fyrifallandi uppgávur, ið Marknaðardeildin varðar av.

Um teg

Vit sóknast eftir tær, ið:

• hevur viðkomandi hægri útbúgving
• dugir væl at skriva lættan og greiðan tekst
• er sera stinn/ur í bæði føroyskum og donskum
• hugsar kreativt og dugir at finna tær góðu søgurnar
• er opin, framsøkin og hevur góð samskiftisevni
• hevur miðvíst og sjálvstøðugt arbeiðslag
  
  

Tað er ein fyrimunur, men ikki eitt krav, um tú ert stinn/ur í enskum, og um tú áður hevur starvast við marknaðarføring ella íleggjarasamskifti.

Vit bjóða

Eitt spennandi og fjølbroytt starv í einum nútímans og livandi arbeiðsumhvørvi. Talan er um eitt fulltíðarstarv fyri starvsfólk í barnsburðarfarloyvi og verður sett 1. juli ella eftir nærri avtalu. Starvið er fyribils tíðaravmarkað til 30. apríl 2024.

Tú verður partur av einum eldhugaðum og fakliga sterkum toymi, har dentur verður lagdur á gott samstarv og at røkka góðum úrslitum.

Vit leggja okkum eftir at seta dugnalig og fjølbroytt starvsfólk, og vit eru tilvitað um kynsbýtið á leiðslustigi og á ymisku deildunum. Vit leggja dent á at tryggja góðan trivnað í gerandisdegnum, og at javnvág er millum arbeiðslív og frítíð.

Umsókn

Hevur starvið tín áhuga, kanst tú søkja her í seinasta lagi 8. mai 2023. Allar umsóknir verða viðgjørdar í trúnaði. Vilt tú hava meira at vita um starvið, ert tú vælkomin at seta teg í samband við Rúnu N. Rasmussen, leiðara á Marknaðardeildini, á telefon 230 478 ella á rr@banknordik.fo.