Nýggjastu tølini benda á, at tað gongur framá búskaparliga, og at tað gongur betur, enn tey flestu kanska høvdu óttast. Til dømis smásølan, sum lækkaði sera nógv í vár. Nú hevur hon vunnið tað mista innaftur – og meir aftrat. Hetta er støðan bæði í Evropa og USA. Tað er tó stórur munur millum vinnugreinirnar. Handil á netinum hevur av álvara vunnið frama, meðan tað gongur verri hjá fysiskum handlum. Tað er serliga tungt hjá ferðavinnuni og matstovuvinnuni, meðan til dømis timburhandlar og lágprísmatvøruhandlar kunnu vísa á stóran vøkstur.

Hóast búskapurin batnar skjótt, er enn kreppa. Arbeiðsloysið er enn stórt, hóast tað minkar. Stóri spurningurin er nú, um hugurin at taka váða á marknaðunum megnar at halda partabrøvunum uppi, til búskapartølini vísa greið tekin um, at kreppan er av.